Test: Honor Band 6. Eng chiroyli smart braslet

Test: Honor Band 6. Eng chiroyli smart braslet

Huawei Band 6 brasletidan keyin 15 kun davomida Honor Band 6 brasletini test qilib koʻrdim. Brasletning deyarli hamma rejimlarda ishlatdim, yaxshi va yomon tomonlarini tahlil qildim. 

 

Nima uchun Honor Band 6? 

Smart brasletlarga muhabbat menda Xiaomi Mi Band brasleti bilan boshlangan. Mi band 2dan 6gacha Xiaomining hamma brasletini ishlatib koʻrganman. Boshida revolyutsion boʻlgan bu brasletlarning muammosi shundaki, dizayn jihatdan 6 yilda katta oʻzgarish boʻlmadi. Shuningdek, Mi Fit mobil ilovasi ham ancha noqulay va unda ham yaxshilanish deyarli sezilmadi. Shundan soʻng boshqa brendlar brasletlarini birma-bir test qilib koʻrdim. Eng koʻp maʼqul boʻlgani Huawei Band 6 boʻlgandi. Undan soʻng, Huawei kompaniyasidan ajralib chiqqan Honor Band 6ni koʻrib qoldim va uni ham test qilishga qaror qildim. Brasletlar juda oʻxshash, faqat yaqindan ishlatib koʻribgina kichkina farqlarni topish mumkin. 

 

 

Dizayn. 

Bu brasletda menga eng ko'p yoqqan jihati bo'ldi. Mi Bandlardan soʻng odam butunlay yangi va qulay dunyoga oʻtgan boʻladi. Brasletda katta ekran ishlatilgan va bir koʻrganda buni koʻproq brasletdan koʻra smart soat deb nomlash osonroq boʻlar edi, menimcha. Tashqaridan qo'lda brasletni ko'rgan odam ham, 499 000 so'mlik braslet emas, qimmat soat deb o'ylashi mumkin. 

Men soʻnggi bir yilda smart soat ishlatdim. Smart soatdan koʻra brasletda bir narsa maʼqul boʻldi, smart soatning qalin silikon tasmasi tagida namlik yigʻiladi, qoʻl terlaydi va bu yetarlicha yoqimsiz hissiyot. Smart brasletning tasmasi ancha ingichka va bunaqa muammo kamroq bezovta qildi.

Shuningdek, menga Honor Band 6ning Huawei Band 6dan yoqqan tomoni uning oynasi atrofi ya'ni korpusi yaltiroq emas, aksincha mat (матовый) ekanligidir. Huawei Band 6da yaltiroq korpus boʻlib, odatda kamtarona narsalarni yoqtiradigan men kabi insonlarga xunukroq koʻrinishi mumkin. Yaltiroq korpus menimcha osonroq qiriladi va unda turli xil chiziqlar yorqinroq aks etadi. Uzoq muddat ishlatadigan odamga bu ancha farq berishi mumkin. 

Shuningdek, eng katta yutuqlardan biri smart soatlarga xos katta AMOLED ekrandir. Ekran haqiqatdan sifatli va juda premium koʻrinish beradi. 

Tan olib aytay, Honor Band 6 men koʻrgan eng chiroyli dizaynga ega Smart braslet boʻldi. 

 

 

Mobil ilova. 

Smart braslet ham Smart soat kabi smartfon bilan birga ishlatiladi. Smartfondagi mobil ilova brasletdan kelib tushgan maʼlumotlarni sizga tahlil qilib beradi. 

Honor Huaweidan hali toʻliq ajralib chiqib ulgurmagan. Shu uchun ham brasletda Huawei Health mobil ilovasi ishlatiladi. Ilova juda qulay, iPhone va Androidda bir xil muammosiz ishlaydi. Ilovaga ulanish Bluetooth orqali boʻladi. Shu uchun braslet maʼlumotlarini olib turishi uchun smartfonda bluetooth doim yoqilgan boʻlishi yoki kun davomida bir necha marotaba yoqib oʻchirilishi kerak. Ilovada funksiyalar joylashuvi, ularni ishlatish Mi Fitdan koʻra ancha tushunarli. Maʼlumotlar ham aniqroq taqdim etiladi.


Funksiyalar. 

Bu jihatdan braslet klassik funksiyalarga ega. Bu 10 xil sport rejimi, harakat nazorati, uyqu va yurak urishi nazorati, stress oʻlchami va telefondan keladigan turli xil maʼlumotlarni aks etish. Masalan, sizga sms, telegram orqali xabar yoki telefon boʻlsa, braslet sizni qoʻzgʻalish bilan ogohlantiradi. Siz qaysi ilovalar sizga maʼlumot joʻnatishi mumkinligini tanlashingiz, alohida ilovalar uchun yoqishingiz mumkin. Men braslet bezovta qilishini xohlamiyman, shu uchun shu zahoti hammasini oʻchirib qoʻydim. 

Shuningdek, brasletlarda soʻnggi paytlarda paydo boʻlgan funksiyalardan Spo2 yaʼni bu qondagi kislorod hajmini oʻlchab koʻrish funksiyasidir. Karantinda koʻpchilik pulsoksimetr qidirib qancha ovora boʻlganligini bilasiz. Braslet professional tibbiy texnika hisoblanmagani uchun maʼlumotlarni ehtiyot boʻlib talqin qilish kerak deb oʻylayman. Lekin, umumiy pulsoksimetr bilan solishtirganda natijalar juda oʻxshash chiqdi, koʻrinishidan oʻpkam yaxshi ishlayapti)) 

Yana bir menga yoqqan tomonlari, uyqu sifatini soatlar boʻyicha tahlil qilib berishi boʻldi. U toʻrt fazada oʻrganiladi: Chuqur uyqu, chuqur boʻlmagan uyqu, tez uyqu va kunduzgi uyqu. 

Sport rejimlari haqida aytsak, Huawei Band 6ning kichik ustunligi shunda aks etadi. Huawei Band 6da 96 xil sport rejimi boʻlsa, Honor Band 6da bu 10 xil klassik rejimlardan iborat. 

 

Akkumlyator. 

Mana shu yerda smart brasletlarning smart soatlaridan haqiqiy ustunligi ko'rinadi. Masalan, Xiaomi Band 6da bir martalik toʻliq quvvat 7-9 kunga yetsa, Honor Band 6da intensiv holatda 10 kunga, oddiy foydalanganda 14 kunga yetadi. Bunga test qilib oʻzim ham guvoh boʻldim, standart ishlatganda roppa-rosa 14.5 kunda braslet oʻchdi. Brasletni toʻliq quvvatlash 80 daqiqa davom etadi. Smart soatini har tunda quvvatlaydiganlarga alohida salomlar)) 

 

Kundalik foydalanish. 

Smart brasletlar suvda ishlashiga koʻnikib qoldik. Bu borada Honor Band 6da ham muammo boʻlmadi. Cho'milda biror marta brasletni yechib qoʻymadim. Shuningdek chang boʻronda ham ishlatishga toʻgʻri keldi va muammo sezilmadi. Yana bir muhim maʼlumot, Huaweida ham, Honorda ham brasletlar oleofob qoplama bilan qoplangan va turli xil dogʻlardan himoya bor. Yogʻlik qoʻl bilan tegilmasa, boshqa dogʻlar deyarli qolmaydi. 

 

Kamchiliklari: 

Yaxshi tomonlarini aytdik, kamchiliklarini ham aytib oʻtish kerak. 

1. Qondagi kislorod avtomatik o’lchanmaydi. Oʻzingiz har safar kerak bo’lganda qoʻlda funksiyani yoqib oʻlchab koʻrishingiz kerak. 

2. Always-on funksiyasi yoʻq. Yaʼni ekran doim yoqilgan turmaydi. Ekranni yoqish uchun qoʻlni qimirlatish yoki yon tomondagi knopkani bosish kerak. 

3. Musiqani braslet orqali boshqarib boʻlmaydi. Bu aslida qulay. Masalan, simsiz quloqchin orqali musiqa eshitib turgan holatda keyingi qoʻshiqqa oʻtish yoki pauzaga qoʻyish uchun smartfonni qoʻlga olmasdan, braslet orqali buni qilish imkoni boʻlsa, katta foyda boʻlgan boʻlardi. 

4. Masofadan smartfonning kamerasini boshqarish funksiyasi yoʻq. 

 

 

Xulosa qiladigan boʻlsa, Honor Band 6 bugun oʻz puli uchun bu shubhasiz eng zoʻr brasletlardan biri hisoblanadi. Men koʻproq Honor Band 6 brasletini 14 kunlik quvvati va ajoyib dizayn uchun tanlagan boʻlardim. Brasletning tavsiya narxi 499 000 Soʻm. Asaxiy Uzda hozirda braslet 459 000 Soʻmdan chegirma narxda sotilmoqda.

 

#tavsuyu 

 

© Firuz Allayev

 

asaxiy app image

Сизнинг интернет дўконингиз